“Rusiyanı Parisdə sevmək asandır” – Kseniya Sobçakı “qovdular”

Rusiyalı jurnalist və teleaparıcı Kseniya Sobçak Parisdə keçirilən “Dior” moda nümayişinə qatılıb.

Dergi.az xəbər verir ki, moda həftəsi çərçivəsində keçirilən tədbirə gedən Sobçaka fotoqraflardan biri etiraz edib.

Evgeni adlı fotoqraf sosial şəbəkədə paylaşdığı videoda Sobçakın nümayişə doğru getdiyi an ona “Ksyuşa, evə gedin!” deyə səslənib. O, paylaşımına “Rusiyalı təbliğatçıları Avropadan qovmaq” ifadəsini də əlavə edib.

Videonun şərh bölməsində bəzi istifadəçilər fotoqrafı dəstəkləyib və Sobçakın niyə hələ də sanksiyalar siyahısında olmadığını soruşublar.

Digər istifadəçilər isə onun İsrail pasportuna və İspaniyada yaşayış icazəsinə sahib olduğunu iddia ediblər. Bu fikirlərlə yanaşı, Sobçakın Avropada moda tədbirlərində iştirak etməsi ilə bağlı müxtəlif tənqidi şərhlər də yazılıb.

Qeyd edək ki, sözügedən paylaşım və istifadəçi şərhlərində səsləndirilən bəzi iddialar müstəqil şəkildə təsdiqlənməyib.